عمرو سلامة ردًا على آراء رافضة لأعمال فنية: "المنع بقى نكتة"
وجه المخرج عمرو سلامة رسالة إلى الجمهور والصناع في الوسط الفني، الذين ينادون بمنع بعض الأعمال أو ينتقدون بعض المشاهد والألفاظ المستخدمة في عدة أعمال تم انتقادها مؤخرًا وأبرزها فيلم السلم والثعبان الذي احتوى على عدد من المشاهد الجريئة والألفاظ التي وصفت بـ «الخادشة».
عمرو سلامة يتحدث عن المنع
وكتب عمرو سلامة عبر حسابه على موقع التواصل الاجتماعي «فيسبوك»:«موافق على الانتقاد… لكن رافض تمامًا طلبات المنع والمعاقبة. طالما قدمت شغلك للجمهور، زي ما أنت عايزه يدفع فلوس، وزي ما أنت مستني إعجاب، يبقى لازم تبقى مستعد تتحمّل النقد… مهما كان لاذع أو قاسي».
وتابع:«لكن الناس اللي عايزة تمنع عمل، أو تعاقب صناعه علشان حاجة مش عاجباهم، أو علشان بيحاكموا العمل بأخلاقياتهم الشخصية… دول في الحقيقة بيضرّوا نفسهم قبل أي حد».
وأوضح عمرو عمرو سلامة:«بكرة لو طلع عمل بيعبر عنهم ويمثلهم، ممكن طرف تاني مختلف — أو محافظ أكتر — يشوف نفسه مهدد، فيطلب هو كمان منعه.. وده معناه إن الفن يبقى ماسخ… ما يناقشش حاجة حقيقية، ما يمثلش أي فئة، ولا يزعّل حد. يبقى مجرد حشو شاشات وسماعات».
عمرو سلامة يدعم النقابة
وأشار:«يعني يبقى المفروض العمل ياخد موافقة الشعب كله قبل ما يتعرض… ولو أكتر شخص متطرف فكريًا ماعجبوش، يتشال من الوجود.. أنا فاهم وجهة نظر اللي شايف إن الشتيمة مش إنجاز ولا حرية ولا جرأة… بس دعمك للمنع بيفتح باب يتمنع من خلاله أي جرأة تانية، أي نقاش حقيقي، أي صرخة من مظلوم».
وعن التغير الكبير الذي شهدته صناعة السينما في السنوات الأخيرة، قال سلامة:«إفتح أي فيلم محترم من التسعينات واسأل نفسك:هل الفيلم ده كان ممكن يتعمل النهاردة؟ بنسبة ٩٠٪ لأ».
وأضاف:«قريب شفت الخماسية العظيمة لعادل إمام ووحيد حامد وشريف عرفة (مع حفظ الألقاب)… وسألت نفسي: هل أي فيلم فيهم ممكن يتعمل النهاردة؟ أقولك؟ هل أي عشر دقايق في أي فيلم فيهم يتعملوا النهاردة؟».
واختتم عمرو سلامة:«لو وافقت إن اللي واقف يمينك يتخرس… يبقى اللي واقف شمالك من حقه يخرسك انت كمان. وفي الآخر، بحيي النقابة وبادعمها على سماحها لأي حاجة مختلفة… حتى لو مش على مزاجي ولا على مزاجها. وضد المنع… أي منع. ةفي زمن كل حاجة فيه متاحة، المنع بقى نكتة… منطق قديم، ديناصوري، وعطن».