هاجر الشرنوبي: دوري في "أزمة ثقة" غامض وعملت بائعة آيس كريم لأجل ابني

تحدثت الفنانة هاجر الشرنوبي عن كواليس مشاركتها في مسلسل أزمة ثقة، الذي يُعرض حاليًا عبر شاشة قناة on e ومنصة watch it الرقمية، وكشفت تفاصيل مفاجئة عن شخصيتها بالعمل.

قالت هاجر الشرنوبي عبر استضافتها في بودكاست وفيها إيه على منصة ستوري بالعربي، إنها انتهت من تصوير مشاهدها في مسلسل أزمة ثقة، قبل حوالي عام من مشاركتها في مسلسل حكيم باشا الذي نافست به ضمن موسم دراما رمضان 2025 الماضي.

وتابعت: "هنشوف الناس هتشوفها بقى شريرة ولا مش شريرة، مظلومة ولا مش مظلومة، نهى شخصية هتفهميها مع الحلقات لأنها غامضة مش مفهومة في الأول، ماتبقيش عارفة دي كويسة ولا مش كويسة، لكنها لذيذة".

وأعربت هاجر الشرنوبي عن سعادتها لعرض المسلسل خلال الفترة الحالية، معلقة: "خلاص الناس ابتدت تحس إن أنا بقيت صفا، خلاص أنا طيبة زي صفا، خايفة كمان لما يشوفوا نهى يبقوا مش فاهمين شريرة ولا مش شريرة من تصرفاتها، الناس تبدأ تتصدم، اللي هو إنتي الشر بعد الخير ده كويس ولا مش كويس؟"

من بيع الآيس كريم لوفاة والدها.. هاجر الشرنوبي تروي أصعب لحظات حياتها

في سياق آخر، كشفت الفنانة هاجر الشرنوبي كواليس لأول مرة عن عملها في بيع الأيس كريم، بسبب مصاريف مدرسة ابنها.

قالت هاجر الشرنوبي عبر استضافتها في بودكاست وفيها إيه على منصة ستوري بالعربي: "كنت عايزة أدفع مصاريف مدرسة ابني، ووقتها مكنتش بشتغل خالص ولا بمثل، كنت قاعدة في إسكندرية".

واستكملت: "اشتغلت أبيع آيس كريم عشان أدفع مصاريف المدرسة، والحمدلله كانت خطوة فارقة جدًا في حياتي، فجأة لقيت نفسي قدام مسؤولية حتى لو كنت متدلعة، المدرسة في شهر 9 وإحنا خلاص في شهر مثلًا 4 فهعمل إيه؟ طب إيه الشغل؟".

وأضافت هاجر الشرنوبي: "رُحت بقى أبيع آيس كريم، كانت فترة مرهقة ونقطة تحول في حياتي، ما كنتش الأول بعرف أتعامل، بعد كده خلاص بقيت أتعامل وبقت فترة بجد فارقة جدًا في حياتي".

وتحدثت عن والدها الراحل ونصائحه لها، قائلة: "أنا كنت شخصية عصبية جدًا وعشان كدة في أي مشكلة كان دايمًا يقولي براحة هتكبري المشكلة هتلاقيها كبرت معاكي، هتصغريها هتحتويها، وهو فعلا كان بسيط عقله كبير وحكيم وبعدها أي مشكلة أقابلها في حياتي أشوفها صغيرة جدًا حتى لو خدت سنين أو وقت طويل".

واختتمت هاجر الشرنوبي قائلة: "قطعًا أصعب لحظة في حياتي كانت يوم وفاة بابا، لأنه مات على إيدي".