جمعت تبرعات لشيكا وعملت فرح السواق في بيتي.. أبرز تصريحات وفاء عامر بـ كلمة أخيرة
تصدرت الفنانة وفاء عامر، مؤشر البحث جوجل ومواقع التواصل الاجتماعي، وذلك بعد حلولها ضيفة في برنامج "كلمة أخيرة" تقديم الإعلامي أحمد سالم على قناة ON، حيث ردت على الاتهامات التي نالتهًا مؤخرًا وعلاقتها بلاعب الزمالك السابق إبراهيم شيكا، وأسباب دخولها مجال تيك توك، وعلاقتها بأم مكة إلى موقفها من الانتقادات التي تعرضت لها على مواقع التواصل الاجتماعي.
وفي التقرير التالي نرصد أبرز تصريحات الفنانة وفاء عامر..
- دخلت مجال التيك توك من 3 سنوات بعد ما تواصل معايا أحد الصحفيين لمساعدة الطفلة رقية.
- فرحت لما عرفنا أننا جمعنا للطفلة رقية 9 ملايين جنيه في البداية ثم وصل المبلغ إلى 42 مليون جنيه.
وفاء عامر تتحدث عن علاقتها بلاعب الزمالك إبراهيم شيكا
- عرفت لاعب الزمالك السابق إبراهيم شيكا في يوم 31 أكتوبر وبعدها عرفت أنه مريض بالسرطان ومحتاج علاج.
- في البداية لما شفت شعر إبراهيم شيكا تقيل فكرت أنه معندوش كانسر وربنا يسامحني.
- الورق موجود وأي حد ممكن يروح لدكتور إبراهيم شيكا ويشوف من المسح الذري إذا كان فيه مشكلة بالكلى أو لا.
- جمعت تبرعات علشان أجيب شقة شيكا والهدف كان تأمين مستقبل أولاده.
اقرأ أيضا
- قبل ما يموت إبراهيم رحت له البيت لقيت إنه مينفعش واحد عنده جروح بالشكل ده ويقعد في بيت كده.
- هبة قالت لي معانا 100 ألف علشان اشتري شقة وبدأت أجمع فلوس وبعت المحامي مع هبة ومعها شيك بتمن الشقة.
- الشقة عليها 150 ألف ودلوقتي هنعمل توكيل للمحامي ونسترد الشقة بسبب المشاكل من والدة إبراهيم وأخواته.
تصريحات وفاء عامر عن أم مكة وأم سجدة
- أم مكة عصامية وبدأت من الصفر وأم سجدة معرفهاش لكن قلت مش ده شكل الست المصرية ولا صوتها.
- عمري ما أكسر بخاطر حد أنا ست عادية وعملت فرح السواق بتاعي في بيتي والمساعدة بتاعتي كمان.
- عندي المحادثة بيني وبين أم مكة بتقول حبسني جوه في القناة والظلم ظلمات.
- قدمت الشات لإدارة القناة وبطلب منهم يعرضوه وأم مكة عندها 4 عيال وعيال أخوها.. أنا بقولهم: أنتم بتناموا كويس؟
- بقول لـ بدرية طلبة إنتي حاسبتي على مشاريب مش بتاعتك وأنا اشتغلت تحت إيد جوزك وكان محترم جدًا.
وفاء عامر: بنيت مسجد لله ورفضت اسمي يتحط عليه
- أنا هفضل واقفة على رجلي وبلدنا بلد مؤسسات ومش هتنازل عن حقي من اللي أذوني.
اقرأ أيضا
- بقرأ مجموعة من الأعمال وممكن أشارك في مسلسل أو اتنين أو تلاتة في رمضان.
- أنا واحدة ملهاش علاقة بحاجة وبحاسب على حاجة معملتهاش.
- محدش خذلني حتى جمهوري ما خذلنيش ربنا يكرمكم ومفيش حد موقفش جنبي حتى اتحاد النقابات الفنية.
- بنيت مسجد وعملته لبلدي ومن خير بلدي ولوجه الله رفضت اسمي يتحط عاوزاه يتحط فوق.
- أنا أول مرة أقول وحلمت به يكون تلات أدوار وفعلا عملته كده ولما بشوف الناس فيه أقسم بالله كأن ابني بيتجوز.
- طول ما أنت صح ميهمكش من حد ومزعلتش من اللي بيهاجموني على السوشيال ميديا قد إيه؟ خمسين كومنت؟ مصر فيها 120 مليون.
- وأنا ماشية في الشارع الناس بتحس بيا ويطبطبوا عليا واللي على السوشيال ميديا ما بيهمنيش.