كفاية استخدام للأطفال جوري بكر تنتقد عرض تفاصيل الحياة الخاصة على السوشيال

أثارت الفنانة جورى بكر الجدل، بسبب انتقادها لظهور الأطفال على السوشيال ميديا، وحياة صناع المحتوى التى أصبحت على الملأ، مؤكدة أن أهم قرار اتخذه هو إخفاء ابنها عن جمهورها على مواقع التواصل الاجتماعى.

وقالت جورى بكر عبر خاصية «ستوري» على حسابها الرسمى على «إنستجرام»: «كلنا خطائين، وكلنا بنغلط، وأنا واحدة منكم وأكيد غلطت، ومن ضمن أخطائى إنى عرضت جزء من حياتى على السوشيال ميديا، بس الحمد لله إن ربنا رزقنى بناس فى حياتى نصحونى وقالولى إن ده غلط، وأنا فعلا سمعت كلامهم وتراجعت، وقررت أحافظ على خصوصيتى وحياتى لنفسى، والأهم إنى أخفيت ابنى تمامًا عن السوشيال ميديا».

وأضافت: «مش هكدب عليكم السوشيال ميديا بقت وحشة أوى، واللى كان زمان مشاركة وفرحة، بقى أحيانا باب للتدخل والحكم والأذى، فى حاجات أجمل لما تفضل بينك وبين ربنا وبينك وبين الناس اللى بتحبك بجد، أنا دلوقتى مؤمنة إن مش كل حاجة حلوة فى حياتنا لازم الناس تعرفها، ومش كل نعمة لازم نعرضها».

واستكملت حديثها: «لأن الحقيقة إن الناس مبقتش محتاجة تشوف كل تفاصيل حياتنا الخاصة على السوشيال ميديا، مش كل حاجة بين الزوجين لازم تتعرض للناس، ومش طبيعى إننا نفتح السوشيال ميديا فنلاقى تفاصيل حميمة جدًا من حياة الناس الخاصة، وكفاية استخدام الأطفال كمحتوى، وكفاية إن مرضنا وتعبنا وأوجاعنا تتحول لمحتوى».

واختتمت: «كفاية إن كل لحظة فى حياتنا تبقى متاحة للناس، سيبوا شوية حاجات تعيش فى الخصوصية، وسيبوا الأطفال، يعيشوا سنهم من غير ما كل لحظة فى حياتهم تتحول لصورة وفيديو ومحتوى، السوشيال ميديا مش حياتنا الحقيقية، وحياتنا الحقيقية تستاهل تفضل أغلى وأأمن من كده».