«أختك أمانة فى رقبتك».. محمد رمضان يوجه رسالة للشباب قبل حفل العلمين

بدأ منذ قليل حفل النجم محمد رمضان، بمدينة العلمين الجديدة، متمنيًا لجمهوره قضاء وقت ممتع خلال الحفل الذى سيتضمن طاقة موسيقية مختلفة.

وكتب رمضان عبر «انستجرام»: «تمنياتى لجميع حضور حفلتى اليوم قضاء وقت ممتع وطاقة موسيقية تليق بكم، وأرجو من كل شاب مصرى جدع يحافظ على سلامة كل بنت ويقول لصاحبه فى غيابه أختك أمانة فى رقبتى، يارب ليلة جميلة وأمان وسلام على كل حبايبى، ومستنى تكتبولى هنا إيه أكتر أغنية عجبتكم على المسرح».

وفى سياق متصل، روج الفنان محمد رمضان للحفل، بطريقة ساخرة، وذلك بعد الجدل الذى أثير مؤخرًا بشأن عدم الترويج للحفل من جانب الشركة المنظمة.

ونشر رمضان مقطع فيديو عبر «فيسبوك»: «بما إننا فى 2026 وعصر غريب، وممكن تصحوا من النوم تلاقوا أى حاجة، متستغربوش. شيء غريب حصل لى النهارده فى الحاجات اللى بتحصل فى 2026. حفلتى يوم 14 أغسطس 2026، ودى الحفلة الوحيدة اللى بعملها فى مصر، وبيجيلى فيها كل جمهورى وحبايبى، وملقتش دعاية للحفلة خالص».

وأضاف: «كلمت المنظمين قولتلهم فين يا جماعة الدعاية؟ قالولى لا، إحنا خايفين نعمل دعاية وخايفين من جمهورك، وإحنا عايزين الدعاية تكون فى إطار الساحل الشمالى بس».

وتابع رمضان: «لكن يا جماعة أنا عايز أعمل حفلة لجمهورى كله، لقيتهم بيقولوا إحنا عندنا حفلة بس مش هنقول عشان التكدس. قولتلهم خلاص يا جماعة، مش هقول لجمهورى إن عندى حفلة فى الساحل الشمالى يوم 14 أغسطس المقبل، وتفهمت كلامهم، ومش هعرف الناس... وادعولى بقى».

وجاء تعليق محمد رمضان بعدما كانت الشركة المنظمة قد بررت عدم إطلاق حملة دعائية واسعة للحفل، مؤكدة أن ذلك يأتى تخوفًا من التكدس الجماهيرى، وهو ما دفع رمضان إلى تناول الأمر بطريقة ساخرة.