أمير رمسيس يهاجم مهرجان عنابة بعد سحب فيلم المخرجة مروة الشرقاوي
أعرب المخرج أمير رمسيس عن استيائه الشديد من تصرف مهرجان عنابة للفيلم المتوسطي في الجزائر بعد سحب فيلم المخرجة مروة الشرقاوي، موضحاً أنه خطأ فادح من إدارة المهرجان بسبب تصرفهم تجاه المخرجة.
أمير رمسيس يعلق على تصرف مهرجان عنابة
وكتب أمير رمسيس عبر حسابه الشخصي بموقع التواصل الإجتماعي فيسبوك: «أعتقد ان تصرفات مهرجان عنابة تسئ للمشهد السينمائي في الجزائر ككل وسحب الفيلم بسبب شكوى المخرجة هو حطا فادح .. كثيراً ما تحدث أخطاء في عالم المهرجانات قي العالم كله و تنتهي بالاعتذار و تقدير الصناع للخطأ البشري».
وتابع: «أما ان يستخدم سحب الفيلم كعقاب للمخرجة فهو تصرف غير مقبول يستوجب الحساب من وزارة الثقافة الجزائرية حماية لسمعة دولة عريقة في المشهد السينمائي العربي، كل التضامن مع مروة ضد عبث المهرجان».
مروة الشرقاوي تهاجم مهرجان عنابة بعد سحب فيلمها
على جانب آخر كتبت مروة الشرقاوي في منشور عبر حسابها الشخص بموقع فيس بوك: الجزائر بلد بياخد القلب بناسه، ودفئه، وشوارعه الجميلة، والبوست ده أنا اتأخرت اكتبه فقط احترامًا لأصدقائي الجزائريين النبلاء، ولتاريخ السينما الجزائرية المهم جدًا، ومن شهرين تواصلوا معايا بقبول فيلمي في مهرجان عنابة، وبعدها أرسلوا تذكرة سفر غريبة ما فيهاش أي تفاصيل، حاولت أتواصل معاهم، لكن مفيش أي رد، لا على إيميل ولا تليفون.
وتابعت مروة الشرقاوي: التذكرة طلعت مفتوحة، يعني لو فيه كرسي فاضي هتسافر، ولو مفيش ترجع، وقفت 4 ساعات في المطار، وطلعت الطيارة قبل إقلاعها بـ 5 دقايق، بشكل مهين جدًا، مافيش تذكرة داخلية من الجزائر لعنابة، ولا حد اتصل بيا، ولولا أصدقائي الجزائريين اللي شالوني فوق راسهم، مكنتش عارفة أروح فين.
مروة الشرقاوي: التجربة كابوس على كل المستويات
وأضافت: رحت الفندق اللي مكتوب في الإيميل، لكن اكتشفت الصدمة: مفيش حجز باسمي، والفندق مايعرفش حاجة عني، أصدقائي خدوني لفندق تاني بعد إحساسهم بالإحراج من تصرفات إدارة المهرجان، ولا حد من المهرجان كلّمني، ولا حتى اعتذر.. مدير المهرجان اتصل مرة وقال هيحل المشكلة، وبعدين اختفى هو كمان.
واختتم مروة الشرقاوي: بفكر دلوقتي لو ماعنديش فلوس أو أصدقاء هنا، كان مصيري إيه؟، كانوا هيسيبوني في الشارع؟، واضح إن النجوم ليهم اهتمام، أما صناع الأفلام المستقلة يترموا في الشارع، هل ده جزاء اللي بنحاول نقدمه من فن، نفسي أركب أول طيارة وارجع بلدي، عمري ما كتبت شيء هجومي عن مهرجان عربي، لكن التجربة دي كابوس على كل المستويات: التنظيمية، المهنية، والإنسانية.