بعد حوارها مع «إيجبتك».. شرشار ترد على عمرو أديب: "لن أعتذر عن فضح الفساد"
ردت حنان فايز شرشار القيادية بحزب حماة وطن على تصريحات الإعلامي عمرو أديب، التي استضاف فيها أحمد بهاء شلب، رئيس الهيئة البرلمانية لحزب حماة الوطن، والذي أكد أن حنان فايز شرشار اعتذرت عن الفيديو الذي تحدثت فيه عن "بيع كرسي البرلمان مقابل 25 مليون جنيه".
وقالت شرشار عبر صفحتها الشخصية على "فيسبوك" أنها لم تعتذر عن كلامها : "أسفًا أستاذ عمرو، لم أعتذر لأن الاعتذار يعني أنني كذبت، وأنا لم أكذب"، مؤكدة أنها لن تعتذر عن قول الحق، حتى لو كان ذلك سيصل إلى الموت وموقفها لن يتغير ولن تخضع للضغوطات.
وأضافت: “لن أترك نصر الحق على الباطل مهما كلفني الأمر، ولن أسكت عن فساد داخل الحزب، فالكلام عن بيع مقاعد البرلمان ليس كذبة بل حقيقة”، مؤكدة أنها ستستمر في فضح الفساد داخل الحزب مهما كانت التهديدات.
البداية.. سنوات من الجهد بلا مقابل
وكانت حنان شرشار قد قالت في حوار مع «إيجبتك»:"أنا بشتغل في حزب حماة الوطن بقالى اكتر من سنتين وامتلك خبرة في العمل السياسي اكثر من 6 سنوات، واشتغلت في انتخابات الرئاسة ونزلت الشارع، وكنت باصرف من جيبي، من غير ما أستنى أي مقابل، عشان الهدف كان واضح: خدمة البلد، مش مصالح شخصية".
وأضافت: "لكن لما جه وقت الترشح، لقيت نفسي مش موجودة.. لا اسمي اتكتب، ولا حد كلّمني، رغم إن شغلي معروف، ومجهودي واضح في الوراق".
"طلبوا مني 25 مليون جنيه علشان أترشح"
أشارت شرشار إلى أنها تواصلت مع قيادات الحزب بشأن الترشح لمجلس الشيوخ سابقًا، لكن الرد كان صادمًا:
"قالي صراحة: 25 مليون جنيه! قلتله ده مبلغ كبير، قالي (انتي مش عايشة في مصر؟)، وأنا عندي مقر وباصرف على الحملات، مش منطقي المبلغ ده أبدًا!".
وأكدت أنها حاولت التصعيد للمستويات الأعلى في الحزب، لكنها قوبلت بالتجاهل:
"رُحت للمركزية، محدش رد.. وكل ما أبعت لقيادات الحزب، مفيش رد، وكأننا مش موجودين، واللي يشتغل مابياخدش حقه".
المقاعد بتتباع.. والناس بتتسخر
وعن رؤيتها العامة لما يحدث، قالت: "الناس اللي اشتغلت على الأرض بيتسخّروا، والمقاعد بتروح لناس نازلة بـ(باراشوت)، مش مهم اشتغلت قد إيه ولا إيه أرضيتك الشعبية".
وأضافت:"فيه ناس من بره جايين يطلبوا الترشح على أماكننا وإحنا لينا سنين شغالين، ده ظلم بيّن، وبيقتل أي أمل عند الشباب".
رسالة للقيادات.. وللرئيس السيسي
بعثت حنان برسالة مباشرة لرئيس الحزب: "حضراتكم عارفين شغلي وبتواصل معاكم وعارفين شغلي كويس ارجو من حضراتكم احقاق الحق".
كما وجهت نداءً إلى الرئيس عبد الفتاح السيسي:
"نفسي صوتي يوصل للرئيس السيسي.. أنا واخدة دورة في الرقابة الإدارية، وفاهمة يعني إيه فساد، ومتأكدة إن الرئيس مش ممكن يرضى بكده".
دعوة لمراقبة الأحزاب
طالبت شرشار بوجود جهة رقابية مستقلة لمراجعة أداء الأحزاب السياسية، قائلة:
"مفيش رقابة على اللي بيحصل داخل الأحزاب، وأشخاص بتترشح بشهادات مش واضحة، بيتقال عليهم دكاترة، ومحدش بيراجع، واللي بيشتغل فعليًا في الشارع ما بياخدش فرصته".
هكمل.. حتى لو مستقلة
أنهت حنان شرشار حديثها بتأكيد استمرارها في العمل السياسي:
"أنا ليا أرضية في الشارع، وعاملة شغل حلو، وهكمل حتى لو الحزب قفل الباب، مش فارق معايا التهديدات، ولا هاسيب حقي".
