«خلينا بيبان».. أحدث قصائد الشاعر محمد مغاوري في شعر العامية|خاص
«خلينا بيبان» أحدث قصائد الشاعر «محمد مغاوري» في شعر العامية ضمن قصيدة من ديوانه الجديد، الذي يصدر عن الهيئة المصرية العامة للكتاب، والذي من المقرر صدوره بالتزامن مع افتتاح الدروة الـ57 من معرض القاهرة الدولي للكتاب 2026، التي من المقرر إقامته يوم 21 يناير من الشهر الجاري.
يا رب
خلّينا بيبان
شبابيك
وبيوت
وما ترسمناش فـ خريطة حدود
خلّينا عمود يتسندوا عليه
"كان صوتي، وكُنت ساعتها عينيه"
خلّيني أنا صوت وعينين
سخّرني ما تستبدلش وجودي بـ ناس حقيقيّة
خلّيني حقيقي وعينْني أتشكّل زيّ الميّاه
أتشكّل زيّ حبايبك ما بيحتاجوا
خلّيني لـ كلّ غريب فـ سرير فـ القصْر العيني علاجُه
دلّني للجاي همشيه زيّ ما يرضيك
شاور بـ الشّكل اللي يليق بيك
وراضيني وعينْني
يا رب
اقبلني
بناجيك وأنا عارف إنك مش محتاج تسألني
بناجيك علشان متعشّم فيك أكتر من نَفْسي
مش عارف نَفْسي
وبحاول أكون غير همَّا ما كانوا
فيه ناس يرموا الواحد فـ النّار
وتلومُه عشان دُخَّانُه
وفيه ناس توهب نفسها للناس وتوزّع دَفا وأمان
خلّينا بيبان
ومكان عَمْران
وارسمنا مَمَرّ
خلّينا الخير للناس حتّى إن رفضوه وشافوه الشّر
خلّينا نكون سكّينة فـ إيد الخِضْر
أو طوبة فـ وسط جدار قوّمُه بـ إيديه
خلّينا مُجَرَّد غيمة مصاحبة النَّبي للشام علشان تحميه
خلّينا إنشالله جنيه..
فـ إيدين محتاجة جنيه
أحسن ما نكون مليون فـ إيدين طمّاع
خلّينا نكون كام كلمة تهدّ صراع
أو نعمة متتقدّرْش
خلّينا نضحّك عيّل عيلتُه مبتهزّرش
والهمنا الحكمة/ السّيرة/ الرّحمة/ الصّبْر/ الوعْي
والهمْنا نكمّل سعْي
ونموت من غير أحزان ولا نعي
ونعدِّي خُفاف
عايشين فـ النَّار
فـ قلوبنا الجَنَّة
وعقولنا على الأعراف
خلّينا بيبان مفتوحة ومش لازم نتشاف
"سلامات للطير اللي بيمشي وما يسيبش آثار"
خلّينا بيبان..
والهِمْنا نكون..
الشّجرة الناجية من الإعصار.