محمد أنور لـ أحمد السقا: السوشيال ميديا طلعت كل اللي في النفوس
وجه الفنان محمد أنور رسالة دعم إلى الفنان أحمد السقا، بعد حملة الهجوم الذي تعرض له الأخير الفترة الأخيرة بعد دعمه للاعب ليفربول محمد صلاح مع مدربه آرني سلوت، وجاء ذلك من خلال منشورًا عبر حسابه الرسمي بموقع “إنستجرام”.
محمد أنور يدافع عن أحمد السقا
ونشر محمد أنور، صورة جمعته بـ أحمد السقا، عبر حسابه الرسمي بموقع “إنستجرام” وكتب: "أحمد السقا فعلًا ميجا ستار.. فيه ناس بتقولها على نفسها معملوش ربع تاريخه.. ولا أعمالهم هتعيش وهتعلم زي أعماله.. كل أفلامه علامات في تاريخ السينما المصرية.. أحمد السقا أصبح أيقونة في الأكشن.. والناس في الشارع لما بتلاقي واحد قلبه جامد بتقوله أنت فاكر نفسك أحمد السقا ولا إيه".
وأضاف محمد أنور: “ومحمد صلاح عمل تاريخ مشرف وأصبح ملهم.. وخلى المستحيل ممكن.. ووصل لمكانة أظن مفيش حد عربي هيوصلها تاني.. على الأقل طول ماحنا عايشين .. فبدل ما نفرح إننا حضرنا ده.. لا بنحاول نهده ونفرح فيه وبنتمنى وقوعه بسرعة.. وقبلهم مجدي يعقوب وعمرو دياب ومنى زكي .. وخوض في أعراض ومين طلق ومين إتجوز ومين مات وغيرهم كتير”.
وتابع محمد أنور: "السوشيال ميديا مفيدة أحيانًا .. وفيها ناس محترمة كتير وكلامهم مهم وآراءهم محترمة، حتى لو كان نقد سلبي لكنهم للأسف قلة .. أما الغالبية العظمى والأكثر تأثيرًا على السوشيال ميديا كلها تريندات هدم .. سواء في شخص أو مجتمع وشتايم وتريقة وإثارة فتن .. ودي بتأثر عالوعي الجمعي أكتر .. وأنا نفسي بتأثر بده حتى لو كنت أعرف الشخص ده وعارف إنه مايعملش كده لكني للأسف بصدق".
وأردف محمد أنور حديثه قائلًا: "السوشيال ميديا أصبحت مرعبة حقيقي .. وطلعت كل اللي في النفوس .. بقى سهل الواحد يطلع كل السواد اللي جواه في الحقيقة عالسوشيال ميديا من غير خوف .. ومحدش شايفه ولا هيحاسبه .. ومحدش بيحط نفسه مكان اللي بيشتمه ده إنه مهما كانت نجوميته أو مركزه وقيمته في المجتمع .. فهو في الآخر إنسان زيك".
واختتم محمد أنور: "لما يقرأ الكلام ده أو حد من أهله أو أولاده ممكن يحصله إيه ؟ .. وهينام اليوم ده عامل إزاي؟ .. ومحدش بيديله فرصة يدافع عن نفسه .. يمكن يبقي مظلوم .. بس إزاي نسمع منه كده التريند هيبوظ، المهم هو التريند .. هنستلم مين النهارده ونهينه هو وأهله بسرعة مفيش وقت .. علشان بكرا فيه تريند جديد وضحية جديدة .. هينام بكره معيط هو كمان".
